بانکی رەشید دەستدەکات بە بەرزکردنەوەی موچەی خانەنشینان

بانکی رەشید ئەمڕۆ چوارشەممە دەستپێکردنی بەرزکردنەوەی موچەی خانەنشینانی بۆ مانگی ئێستای مانگی 11 راگەیاند، دوای پێشتر ئه‌نجومه‌نی وه‌زیران بڕیاری به‌رزكردنه‌وه‌ی موچه‌ی ئه‌و خانەنشینانه‌ی ده‌ركردبو كه‌ موچه‌كانیان له‌ ملیۆنێك كه‌متره‌.

بانکی رەشید لە بەیاننامەیەکدا باسی له‌وه‌كردوه‌، ئەمڕۆ چوارشەممە بانکەکە دەستیپێکردوه‌ بە بەرزکردنەوەی موچەی خانەنشینانی مەدەنی و سەربازیی بۆ موچه‌ی مانگی 11ی 2023.

موچەی ئه‌م مانگه‌شیان ئەو زیادکردنە لەخۆدەگرێت کە سەرۆک وەزیران بڕیاریلێداوه‌

ئاماژەی بەوەشکردوە، ئەو خانەنشینانەی کە کارتی بانكیان هەیە دەتوانن بچنە لقی بانكه‌ و ئامێری ATM و فرۆشگاکانی بانکەکە بۆ ئەوەی پارە داراییەکانیان وەربگرنەوە، موچەی ئه‌م مانگه‌شیان ئەو زیادکردنە لەخۆدەگرێت کە سەرۆک وەزیران بڕیاریلێداوه‌.

مانگی رابردو له‌ كۆبونه‌وه‌ی ئه‌نجومه‌نی وه‌زیرانی عێراق بڕیاریدا 100 هەزار دینار بۆ موچەی هەر خانەنشینێک زیاد بکرێت

24ی مانگی رابردو له‌ كۆبونه‌وه‌ی ئه‌نجومه‌نی وه‌زیرانی عێراق بڕیاریدا 100 هەزار دینار بۆ موچەی هەر خانەنشینێک زیاد دەکرێت، کە موچە بنەڕەتییەکەی لە ملیۆنێک دینار کەمترە.

ژمارەی تەواویی خانەنشینان لە عێراق سێ ملیۆن و 600 هەزار کەسە

بەپێی ئاماری دەستەی خانەنشێنانی گشتی سەر بە وەزارەتی دارایی، ژمارەی تەواویی خانەنشینان لە عێراق سێ ملیۆن و 600 هەزار کەسە، لە یاسای بودجەی ساڵی 2023ش لە بڕگەیەکدا کەمترین موچەی خانەنشینی بە 500 هەزار دینار جێگیرکراوە.

لە هەرێمی کوردستان کەمترین موچەی خانەنشینی 200 هەزار دینارە، لە کاتێکدا لە عێراق کەمترین موچەی خانەنشینی 500 هەزار دینارە، بڕیارەکەی ئەنجومەنی وەزیرانی عێراقیش هەرێم ناگرێتەوە، چونکە کارگێری هەرێم کار بە یاسای خانەنشینی یەکگرتو ناکات.